टर्कीमा ४७ जना पत्रकारलाई पक्राउ गर्न आदेश, १३१ सञ्चार माध्यममाथि प्रतिबन्ध
radiorajmargaInternational
एजेन्सी । टर्की सरकारले विभिन्न सञ्चार माध्यममा प्रतिबन्ध लागाएको छ । दुई हप्ता अघि भएको असफल सैनिक कुको प्रयासमा साथ दिएको आरोपमा टर्की सरकारले समाचार संस्था, टेलिभिजन, दैनिक पत्रपत्रिका, म्यागजिन तथा प्रकाशक गरी एक सय ३१ वटा सञ्चार माध्यम बन्द गराएको समाचार संस्था रोयटर्सले जनाएको छ । गएको जुलाइ १५ मा भएको कुमा संलग्न भएको आरोपमा तीन वटा समाचार संस्था, १६ वटा टेलिभिजन, ४५ वटा दैनिक पत्रपत्रिका तथा १५ म्यागजिन बन्द भएका छन् । यस्तै २९ वटा प्रकाशन संस्था पनि बन्द गरिएका छन् । बन्द गरिएका सबै सञ्चार माध्यम अमेरिकासहितका पश्चिमा राष्ट्रबाट प्रभावित वा समर्थित रहेको रोयटर्सले उल्लेख गरेको छ ।
सरकारी अधिकारीले ४७ जना पत्रकारलाई पक्राउ गर्न आदेश दिएका छन् भने ४२ जना पत्रकार विरुद्ध वारेन्ट जारी भएको छ । यस्तै १६ सय ८४ जना सैनिक अधिकारीलाई पद मुक्त गरेको छ । जसमा एक सय ४९ जना जनरलसहितका उच्च अधिकारी छन् । टर्की सरकारले सैनिक कुको असफल प्रयासमा अमेरिकामा बस्दै आएका धर्मगुरु फतहुल्लाह गुलेनको हात रहेको आरोप लगाउँदै आएको छ । गुलेनले भने आफ्नो कुनै पनि किसिमको संलग्नता नरहेको बताउने गरेका छन् । सत्ता कब्जाको प्रयासको क्रममा कम्तिमा दुई सय ४६ जनाको ज्यान गएको थियो भने दुई हजार भन्दा धेरै घाइते भएका थिए ।
२०७३ साउन १३ गते प्रकाशित