सुनसरी, वैशाख १७ – प्रधानमन्त्री केपी शर्मा ओलीले मधेसीको घर घरमा शिक्षा, स्वास्थ्य र विकास पुर्‍याउनुपर्ने बताउनु भएको छ ।
नयाँ संविधानले मधेसीका अधिकार सुनिश्चत गरेकाले अश मधेसीका घर घरमा विकास पुर्याउनु पर्ने बताउनु भयो । सुनसरीको इनरुवामा जिल्लाका सरकारी कार्यालयका प्रमुखहरुलाइ निर्देशन दिँदै उहाँले अधिकार पाइएन भन्ने मधेसीसँग बिवाद गर्नुभन्दा उनीहरुलाई सेवा प्रदान गर्न आग्रह गर्नु भयो ।
जारी संविधानले कसैलाई बिभेद नगरेको दावी गर्दै प्रधानमन्त्री ओलीले मधेसमा भ्रम फैलाइएको बताउनु भयो । उहाँले नेपालमा स्थिरता र स्थायित्व नचाहाने तत्वले मधेसीलाई अधिकार दिइएन भनेर हल्ला चलाएको र हाम्रा केहि दाजुभाइ पनि हल्लाका पछि लागेको बताउनु भयो ।
आफू समानता र न्यायका लागि लडेको भन्दै प्रधानमन्त्री ओलीले नेपालको संविधानमा कँहि कतै बिभेद नरहेको बताउनु भयो । कार्यक्रममा आफू विकासका लागि सिंहदरबार गएको उल्लेख गर्दै आफ्नो अभियानमा साथ दिन सबैलाई आग्रह गर्नुभयो ।
‘कार्यालय प्रमुखहरु यो अभियानको स्थानीय नायक हो । तपाइँहरुले पुरानो ढाँचाबाट नभएर नयाँ ढाँचाबाट कार्यलयमा सेवा प्रवाह र योजना बनाउनु पर्छ’ उहाँले भन्नुभयो । यसअघि प्रधानमन्त्री इनरुवा आउने भएपछि मधेसी मोर्चाले इनरुवाका सरकारी कार्यालयहरुमा कालो झण्डा गाडेका थिए । मोर्चाले प्रधानमन्त्रीलाई इनरुवा प्रवेशमा रोक लगाउने भनेपछि सुरक्षा अवस्था कडा पारिएको थियो ।उज्यालोबाट