भदौ १५, काठमाडौं । नौबिसे काठमाडौं सुरुङ मार्ग निर्माणमा सहयोग गर्न नेपाल सरकारले राखेको प्रस्तावमा जापानका एक मन्त्रीले सकारात्मक जवाफ दिएका छन् । काठमाडौं भित्रिने यातायातलाई सहज बनाउन भन्दै सरकारले काठमाडौंको सितापाइलादेखि धादिङको नौबिसे जोड्ने अन्तराष्ट्रियस्तरको सुरुङमार्ग निर्माण प्रक्रिया अघि बढाउन १ अर्ब ६६ करोड ५० लाख रुपैयाँ बजेट छुट्याएको थियो । तर, काम भने अघि बढ्न सकेको छैन ।

आज बिहान प्रधानमन्त्री पुष्पकमल दाहाल ‘प्रचण्ड’ले जापानका परराष्ट्र राज्यमन्त्री नोबु किसीसँगको भेटमा उक्त सुरुङ मार्ग निर्माणमा सहयोग गर्न आग्रह गरेका थिए । र, त्यसमा राज्यमन्त्री किसीले १८ अर्ब नेपाली रुपैयाँ बराबरको सहयोग दिलाउन प्रक्रिया अघि बढाउने जानकारी गराएको प्रधानमन्त्रीको सचिवालयले जनाएको छ ।

२ दशमलव ६ किलोमिटर लम्बाइ रहने उक्त सुरुङमार्ग निर्माणमा २० अर्ब रुपैयाँभन्दा बढी खर्च हुने अनुमान गरिएको छ । जापान सरकारको ऋण सहयोगमा जापानी सहयोग नियोग (जाइका)ले सुरुङमार्ग निर्माणमा इच्छा व्यक्त गरेको छ । नेपाल र जापानबीच कूटनीतिक सम्बन्ध स्थापनाको ६०औँ वार्षिकोत्सवको अवसर पारेर दुई भिन्न परियोजना कार्यान्वयन गर्न नेपाललाई जापानले एक अर्ब ८३ करोड २० लाख अनुदान सहयोग पनि उपलब्ध गराउने भएको छ । उपप्रधानमन्त्री एवम् अर्थमन्त्री कृष्णबहादुर महरा र नेपालको तीनदिने औपचारिक भ्रमणमा रहेका जापानका राज्यमन्त्री किसीको उपस्थितिमा अनुदान सहयोगसम्बन्धी सम्झौतामा आज हस्ताक्षर भएको छ । onlinekhabar

२०७३ भदौ १५ गते मा प्रकाशित