असोज ५ – नाइजेरियामा श्रृँखलाबद्ध बम बिस्फोटनमा परी कम्तिमा ८० जनाको ज्यान गएको छ । उत्तरपूर्वी बोर्नो राज्यमा भएको आत्मघाती बिस्फोटमा परी एक सय ५० जना घाइते भएको समाचार संस्था रोयटर्सले जनाएको छ ।
बोर्नो राज्यको राजधानी मैदुगुरीमा तीनवटा बम बिस्फोट हुँदा कम्तिमा ५४ जनाको ज्यान गएको र ९० जना घाइते भएको स्थानीय बासिन्दालाई उद्धृत गर्दै रोयटर्सले जनाएको छ । यस्तै बोर्नोकै मोङगनो शहरको चेकपोस्टमा दुई वटा बम बिस्फोट हुँदा २७ जनाको ज्यान गएको छ । घटनामा ६२ जना घाइते भएको स्थानीय बासिन्दा र घाइतेको उपचार भैरहेको अस्पतालका कर्मचारीले बताएका छन् । बोर्नो राज्य इस्लामिक बिद्रोही संगठन बोको हरामको सबैभन्दा बढी प्रभाव भएको राज्य हो ।
बम बिस्फोटनको जिम्मेवारी अहिलेसम्म कुनै पनि समुहले लिएको छैन । तर सन् २००९ देखि हिंसात्मक गतिविध गर्दै आएको बोको हरामले नै आक्रमण गरेको आशंका गरिएको छ ।
गएको मे २९ मा राष्ट्रपति मुहम्मदु बुहारीले सत्ता सम्हालेदेखि अहिलेसम्म बोको हरामको आक्रमणमा परी ८ सय भन्दा बढी नागरिकको ज्यान गैसकेको छ । बोको हरामको हिंसात्मक गतिविधि सुरुदेखि अहिलेसम्म हजारौंको ज्यान गएको छ भने २१ लाख भन्दा बढी मानिस विस्थापित भएका छन् ।