काठमाडौं, मंसिर १७ । सरकारले चीनसँगको नाका रसुवागढी पुग्ने सडक स्तरोन्नतिको जिम्मा नेपाली सेनालाई दिने निर्णय गरेको छ । मन्त्रिपरिषद्को बिहीबार बसेको बैठकले रसुवागढी पुग्ने सडक दई वर्षभित्र दुई लेनको बनाउने निर्णय गरेको छ । धादिङको गल्छीदेखि रसुवागढीसम्मको ८२ किलोमिटर सडक स्तरोन्नतिको जिम्मा सेनालाई दिइएको छ ।
भारतले अघोषित नाकाबन्दी गरेपछि नेपालले चीनबाट इन्धन आयातको तयारी गरेको छ । चीनले हालै अनुदानमा दिएको तेल केरुङ, रसुवागढी हुँदै काठमाडौं आइपुगेको छ ।
हालै मात्र उपप्रधान एवं भौतिक पूर्वाधार तथा यातायातमन्त्री विजय गच्छदार र अर्थमन्त्री विष्णु पौडेलसहितको टोली समेत सडकको निरीक्षण गरेका थिए ।
मन्त्रिपरिषद् बैठकले मधेसी मोर्चासँगको वार्तालाई निर्णायक तहमा पुर्‍याउन पहल गर्ने निर्णय गरेको छ । बैठकले आन्दोलनका क्रममा क्षति भएका निजी सम्पत्तिको क्षतिपूर्ति दिन र औचित्यका आधारमा मुद्धा फिर्ता लिन गृह मन्त्रालयलाई निर्देशन दिएको छ ।